Deus ‘ta da dremen ur sizhunvezh ‘ba Loperc’hed, e bro Daoulaz e-tal ar mor ! War an dachenn-gampiñ e vo an teltennoù. Tu vo dit analañ aer fresk ar mor ha gweladenniñ an natur gouez tro-dro. Bammet e vi gant ar gweledvaoù tro-dro deomp. Sikouret e vi gant ar skipailh da zont da vezañ produer.ez sinema gant atalieroù da grouiñ ur filmig. Distreiñ a ri zoken d’ar gêr gant ar filmig-se evit sellet outañ gant da vignon.ez.ed. Filmañ ’zo dreist met tu vo ivez bageal gant skipailh a-vicher Rostivieg, hag a zo just e-tal an dachenn-gampiñ. Lusket e vo an devezhioù gant predoù keginet asambles, gant c’hoarioù er-maez, kouronkadennoù … Gant beilhadegoù laouen ha burzhudus e vo plijadur o vezañ a-gevret. Dont a ri ganeomp ?